ANGAS

Gabi. Alas dose. Pagod akong sumakay sa fx galing sa gimik na hindi ako masyadong nag-enjoy. Napagastos nanaman ako. Ayokong gumagastos ng malaki sa mga bagay na hindi ko naman talaga gustong gawin. Mainit ang ulo ko. Gusto kong matulog.

Tididudut Tidududuuut... Tididudut Tididududuuut...

May nagtext sa katabi ko. Ang ingay ng cellphone niya.

Nilingon ko ang katabi ko. Parang sekyu lang sa tabi tabi. May angas ang mukha. Mukhang mayabang tong ugok na to ah.

Nilabas ko ang cellphone ko. Pumunta sa applications, at nag-internet gamit ang phone ko. Gago ka, ang angas mo... may ganyan ba ang 3210 mo? sa isip-isip ko.

Itinago ng katabi ko ang telepono niya. Yan... matuto ka.

Tama na pagyayabang, nanalo na ako. Itinago ko na ang telepono ko. Sa wakas pwede nako bumalik sa pag-idlip.

Ilang saglit lang, nagising muli ako, di dahil sa ingay ng telepono pero dahil sa sakit na naramdaman ko sa aking tagiliran.

"Putang-ina mo ka, pag nagsalita at gumawa ka ng hindi ko gusto, ibabaon ko sa'yo tong icepick ko." bulong ng katabi ko. "Gawin mo lahat ng sasabihin ko puta ka at makakababa ka dito sa fx na 'to ng walang butas sa katawan. Naiintindihan mo?!"

"O-o-opo." nanginginig kong sinabi.

"Akin na ang wallet mo, cellphone tsaka yang bracelet mo. BILIS!!!"

"Kunin niyo na po yung pera, iwan niyo na lang sakin yung mga id ko. Kailangan ko po yun." Tiningnan ko ang paligid ko. Walang nakakaalam sa nangyayari samin dito sa likod. Malakas ang radyo ng drayber na nakikinig ng mga kwentong kabastusan ng mga tagapakinig nito. Mahimbing naman ang tulog ng nag-iisang pasahero sa gitna ng sasakyan.

"Tarantado ka, sinabi ko bang pwede kang magsalita?!" Idiniin ng mama ang nakatusok sa tagiliran ko.

Gustuhin ko mang sumigaw, hindi ko magawa dahil sa takot na tuluyan ako nito. Ginawa ko ang gusto niya. Kinapkapan ako ng mama, tila naghahanap pa ng mga makukuha sakin. Pati bayag ko kinapkapan.

"'Ina mo, nakita mo mukha ko... pag nagsumbong ka sa pulis, alam ko kung saan ka nakatira. Hahantingin kita putang ina ka!!!" binulong niya sa akin. Tuluyan niyang idiniin yung ice pick sa gilid ko. Naramdaman ko ang dugo na tumutulo na palabas ng katawan ko. Pero hindi ako pwede masaktan. Gusto ko pang mabuhay.

Hinugot ng lalaki ang patalim at sinaksak akong muli sa tagiliran. Mas malakas ang pagtusok sa ikalawang pagkakataon at ramdam kong mas malalim ang baon. Hindi ko gustong mamatay ng ganito. Diyos ko tulungan niyo ako, tanging dasal ko.

BANG.

Naramdaman kong huminto ang sasakyan. Naririnig ko ang mga sigawan. Maraming tao ang nakita kong nagkukumpulan sa sasakyan. Pero nagdidilim na ang paligid. Wala na akong nararamdaman.

Gumising ako sa kwartong hindi ko kilala. Biglang nagsisigaw ang isang pamilyar na boses. Ang nanay ko, natatarantang tinatawag ang tatay ko.

Wala na ako masyadong naalala noong gabing iyon. Pero sabi nila, pulis daw yung isang pasahero ng fx. Nung nakita na daw niyang sinaksak ka na, binunot na niya yung baril at pinaputukan ito sa mukha.

Hindi na ako mag-aangas ulit.

***********
Wala ako makwento... maglalaba pa ako... magsasaing at bibili ng kakainin namin ng mga aso ko. Next week pa ako liliban sa opisina ng isang linggo. Sigh.