HALO HALO LANG

FEB GOAL
Kung matatandaan ninyo, isa sa mga ninais kong makamit nitong nagdaang Pebrero ay ang mabawasan ng 10 pulgada sa aking timbang. Medyo nadaya ko siguro ito dahil noong nakaraang linggo, nagkasakit ako kaya ang laki ng nabawas sa aking timbang. Umabot ng 15 lbs. Pero bumalik sa normal, 13 pounds ang nawala sakin. Kaya ngayong Marso, di ako magpapakaambisyoso. Feeling ko mahirap maulit yung nagawa ko noong nakaraang buwan. Kaya 7 pounds lang ang goal ko.

JUST DANCE
Isa sa regalo ko sa sarili ko noong aking nagdaang kaarawan ay ang larong Just Dance para sa Xbox. Noong una, di ko siya naenjoy dahil medyo mahirap siya at hindi kasing player friendly gaya ng Dance Central. Pero noong weekend, nakita ko kung ano ang edge nito sa DC2. Sobrang saya laruin nito pag marami kayo.Parang production number ang ilang kanta gaya ng Boogie Wonderland, Dynamite at Beautiful Liar. Ang kulit lang.

STRESS RELIEVER
Sa mga sumusunod sa akin sa Twitter, marahil mapapansin ninyo na sobrang Bad Vibes ako nitong nakaraang mga linggo. Wala akong ibang naitwit kundi mga reklamo sa buhay at pagkainis sa maraming dahilan. Ang nangungunang dahilan nito ay ang aking trabaho. Sobrang busy ko na ngayon na hindi na ako nakakapagbukas ng internet. Hindi na nga ako nakakakain. At inaasahang lalo pang magiging busy sa mga darating na buwan. Pero kanina, napawi lahat ng stress ko nang ang ginawa kong project ay ibinalik ng aking boss at ng boss ng boss niya na may kalakip na papuri sa aming mga ginawa. Sulit naman pala lahat ng pagod ko.


KWENTONG BUS NANAMAN
Minsan talaga ang swerte ko dahil sa dinami dami ng mga eksenang nasaksihan ko sa pagsakay sa bus, eh ni minsan di pa ako nadamay o nabiktima. Kahapon, may nagsuntukan sa bus na sinakyan ko pauwin. Si kuya kasi, nilaslas yung bulsa ng katabing holdaper. Swerteng naramdaman niya  ang kagaguhang ginawa at nahuli ito. Kaya ayun, bugbog sarado ang mandurukot. Pero sobrang nakakatakot. Paano kung may kasama pala yun at may baril, eh di nakakita kami ng patayan. Scary.


MCDONALDS
Nasira na yung streak ko na hindi pagkain sa Mcdo. Nung Martes ay napakain ako dun, dahil dun kami nagkita ni Kasintahan. At nahiya naman akong tumambay dun nang hindi kami nag-oorder ng pagkain. Dalawang buwan na akong di kumakain dun, di na ata ako sanay sa lasa ng pagkain nila. Sobrang naalatan ako sa cheeseburger nila. One time lang yun. Di na mauulit. Napapanindigan ko pa naman ang di pagkain sa Jollibee at KFC. Sana di yun maputol.