ENERO HANGGANG HUNYO 2010

Akalain mo yun, nasa 2nd half na tayo ng taon. Ang bilis ng panahon. Parang kahapon lang sinecelebrate ko ang bagong taon sa opisina, tapos ngayon, nasa opisina pa rin ako.

At dahil lumampas na ang kalahating taon, eto nanaman ako't iaassess kung naging produktibo ba ako ngayong taon. Marami ba akong nagawa? Mayroon ba akong natutunan? May mga bagong nakilala? O petiks lang ba ako ng anim na buwan? Tingnan natin:

ENERO
Hindi maganda ang pasok sa akin ng unang mga araw ng taon. Namatay ang aso naming 13 taon na naming alaga. Pati ang isa sa mga paborito kong guro noong kolehiyo, ay kinuha na rin ni Lord.
Sinabayan pa ng pagkadepress ko dahil nagkaroon ako ng problema sa aking nililigawan. Nabasted ako, at naapektuhan ang aming pagkakaibigan. Wala nang mas sasakit pa kapag ang isang magandang pagkakaibigan eh nagwawakas ng walang kongkretong dahilan.

PEBRERO
Buwan ng aking pagkapanganak. Medyo nakamove-on na ako sa depresyon ng nakaraang buwan. Malakas ang paniniwala kong swerte ang mga pinanganak ng taon ng mga aso ngayong taon, kaya medyo natuto ako muling ngumiti. Marami akong nakilalang bagong kaibigan, at ilang mga hiling ko noong kaarawan ko ay napagbigyan din. Yay!!! Sinimulan ko rin ang proyekto ko ngayong taon na 10 DAYS. Kung saan ay gagawa ako ng 10 bagay sa loob ng 10 araw ngayong taon na hindi ko pa ginagawa sa buhay ko. Spontaneous baga. At noong unang araw, nagja*$^l ako sa opisina.

MARSO
Pinagsawaan kong magsulat sa isa kong tahanan kaya pansamantala ko iyong iniwan. Kasabay nun ang muling pagsigla ng pagsusulat ko sa tahanang ito. Yun ang ikatlong spontaneous thing na ginawa ko for the year. Ang ikalawa, tumabi ako sa isang dalaga sa Starbucks, para makipag-usap. Makikipagflirt sana ako. Kaya lang, nilayasan niya ako. Buti na lang dati akong telemarketer, namanhid na ako sa iba't ibang uri ng NO. Eto rin pala ang buwan kung kailan kinasal ang unang pares sa aking barkada. Meron nang married samin. Tapos ako na lang ata ang single nyan.

ABRIL
May dalawa pang blogger na aking hinahangaan ang aking nakilala sa personal. Ang mga kasama kong manuod ng isa sa pinaka-astig na pelikula ngayong taon, ang Kick Ass. Muling bumalik ang bumasted sa akin noong kapaskuhan, at medyo unti-unting inaayos ang aming pagkakaibigan. Ano pa ba? Wala masyadong nangyari nitong buwan na 'to. Simula ng training kasi namin sa Phase 3 ng operations ng unit namin. Dito nagsimula ang bawal ang leave hanggang Agosto. Ang dahilan kaya di natuloy ang Palawan trip namin. Sa ikaapat na araw ng pagiging spontaneous ko, sinubukan kong hindi magbayad ng pamasahe sa mga sinakyan ko papasok. Successful ako sa fx, pero sa bus hindi.

MAYO
Ang buwan ng pinakamatindi naming tampuhan ng aking nililigawan. Eto rin yung buwan kung kailan niya narealize na mahal niya ako. Yiiihiii. Oo ako ang nagsaside-comment sa mga sarili kong sinasabi. Para namang lahat kayo, binabasa ng buo ang mga sinusulat ko. Anyway, ayun training pa rin sa trabaho. Sa totoo lang, wala talaga akong maalala sa buwan na ito. Lahat ata natabunan ng kakesuhang ginawa namin noong ika-23 ng Mayo.

HUNYO
Ayan, di na single si Gillboard, tapos napromote pa sa trabaho (although sa Agosto pa ang effectivity ng promotion). Level up lang yun, kaya wag kayo magpalibre. Tapos, nagsimula na rin ako sa bago kong responsibilidad sa trabaho. Bagong challenge, pero kasabay nun, ako'y inspirado na magtrabaho, kaya kahit merong mga sakit sa ulo, nagagawa ko pa ring hindi mastress. At syempre, di ko rin malilimutan ang pagbisita ko sa mumunting cafe ni kaibigan Edsel, ang Kaffe Razzo, na dalawa lang ang naabutan kong blogger. Yung isa, kilala ko pa. Hayst.

Anim na buwan pa bago matapos ang taon. Marami pang dapat akong abangan. Ang pagpunta ng Palawan. Ang lakad namin ni honey sa Oktubre. Ang reunion sa Disyembre. Meron pang isang medyo malaking bagay akong dapat pagdesisyunan na magbabago ng pamamaraan ng aking pamumuhay kung sakaling matupad yun.