NAGBABAGANG MGA BALITA

Magandang araw, tanghali, hapon at gabi mga kababayan, nakatutok nanaman kayo sa isang nagbabagang edisyon ng GNN: Gillboard News Network. Pagkat si Gillboard ay di pa natutulog.

Sa ulo ng mga nagbabagang mga balita:

GILLBOARD PAPANSIN?
Hindi pa man tumutuntong ang buwan ng Pebrero hindi na tumigil tong batang(?) to sa kadadakdak tungkol sa kaarawan nito. Nakakairita na!!!

Hindi niya alam kung bakit nga ba ganun siya tuwing kaarawan niya. Sa kanyang pakikinayam sa sarili niya, nabanggit nito na hindi naman siya nag-eexpect ng regalo o pambati, dahil alam naman niya na may babati sa kanya. Pero gusto lang niyang dumarating ang araw ng kanyang kaarawan. Kahit wala namang espesyal na nagaganap sa araw na ito, natutuwa siya sa pagdating nito.

"Marahil kasi, ganitong araw ko lang nakakausap ang ilang kaibigan na bumabati sakin, na buong taon eh di ko nararamdaman," pahayag ng bata(?).

At bilang patunay, eto nanaman siya nagsusulat ng tungkol sa kanyang kaarawan.

GILLBOARD SUKO NA BILANG KUPIDO...
Marami-rami na rin ang mga binubugaw ni Gilberto, pero ni isa sa mga nirereto nito, wala pang nagtagumpay. Puros sablay.

Ang huling biktima, ang dalawang naging featured friends nito sa kanyang blog na sina Jaja at Francis. Todo effort ito sa ym sa kakakulit sa dalawa para lumabas kahit bilang magkaibigan. At kahapon, nakumbinsi ang isang binata na iadd sa ym yung dalaga.

Kaso nga lang, kahapon may napadala ng virus na di sinasadya si Francis kay Jaja... Heto yung parang ad na pag kinlick mo eh mahahack yung account mo... Hayun, mukhang malabo nanaman ata na matupad ang pangarap ng binatang maging kupido.

Ayon sa mga nakatatanda, kelangan siguro nitong ayusin ang sariling buhay pag-ibig bago makealam sa buhay pag-ibig ng iba.

AT SA KARUGTONG NA BALITA...
Bagong pasok lang na balita, si Gillboard, mukhang malabo nanaman ang buhay pag-ibig. Matapos ng pre-Valentine's date ng binata, ay mukhang naging matamlay ang pakikipag-usap at text nito sa itinatago sa pangalang "Date."

Nang tanungin ng binata kung bakit medyo nanamlay ata ang pakikipagkwentuhan sa kanyang 'kaibigan,' "busy daw siya sa trabaho ngayon eh. Hectic daw ang schedule ng dalaga nitong mga nakaraang mga araw."

"Hindi rin naman ako umaasa. Sa akin na rin nanggaling, na hanggang kaibigan lang naman muna kami." Ang plastik mga kababayan!!! Isang araw, pinapangako ng bata na ikukuwento niya ang naganap noong labas nila noong Pebrero 13, na sa tingin niya ay nakaapekto sa mga kaganapan ngayon.

AT SA ULAT PANAHON
Nagtataka si Gillboard kung bakit ambilis uminit ng panahon nitong mga nakaraang araw. Dapat ganitong mga araw eh medyo malamig pa ang panahon, pero sobrang taas at init ng sikat ng araw. Parang maaga darating ang tag-init.

"Ang sarap na sigurong magbeach?" wika ng batang tatlong beses na naliligo ngayong araw. "Sa mga ganitong panahon, kulang ang isang bentilador para sakin" dagdag niya.

**********

At nagdaan nanaman ang isang araw ng pagbabalita ukol sa buhay ni Gillboard. Alam niya namang wala kayong pakealam kaya titigil na ito. Hanggang sa susunod na edisyon (kung masusundan pa) ng GNN: Gillboard News Network.

Dahil inaantok na ang nagbabalita.