TV COMMERCIALS

Gusto ko lang sabihin na paborito ko nang commercial ang bagong tvc ng McDonald's. Yung First Love.

Ang kwento niya ganito, noong 80's ata yun, may 2 bata, yung babae eh nagsasawsaw ng french fries niya sa sundae. Medyo bago sa batang lalake yung nakita niya. Tapos hinila ng batang babae si batang lalake sabay flash forward. Matatanda na sila. Akala mo nagkatuluyan yung dalawa sabay malalaman natin na may asawa't anak na yung girl. Habang kumakain na silang lahat, napansin ng girl, na yung boy eh nagsasawsaw na ng french fries sa sundae.

Sabay sabi "di man naging kami sa huli, siya pa rin ang first love ko." Lahat ng yan habang tinutugtog ang "Huling El Bimbo" ng Eraserheads.

Napakabittersweet!!! Nakakaantig ng puso, na kahit ako eh natouch. Eh hindi ako masyadong madaling mapabilib ng mga tvc's. Ang galing!!!

McCann Ericson ba may hawak ng advertising ng McDonald's? Ang husay!!!

At dahil dyan, nainspire akong isulat lahat ng mga di ko makakalimutang mga commercial ng tv. Yung mga tipong nanunuod ka na lang ng tv para hintayin ang commercial nitong produktong ito.
Gustuhin ko mang ipost yung mga tv ads dito, ngalang bobo ako sa internet kaya di ko maiupload dito. Gamitin niyo na lang imagination niyo.

COKE - Bridesmaid Ka Lang
Isang buong series ito noong 90's ata yun. Naalala ko si Belinda Pamelo (tama ba spelling?) tsaka yung bida dito. Syempre high school pa lang ako nun, kaya may kilig-kilig pang nalalaman!!! Nakakaaliw yung serye niya dahil gusto mo silang magkatuluyan sa huli. Ewan ko ba, mababaw ako sa mga ganyan.

MCDONALD'S - Karen Po
Medyo nakakarelate ako dito, dahil ang lola ko eh medyo ganyan. Hindi nga lang siya kasing sweet ng lolo ni Karen, pero pareho silang ulyanin. Nung una ko tong nakita, medyo naiyak ako kasi ang galing ng twist. Akala ko patawa lang yung story, sabay kakabug sa damdamin mo. Siya pala yung gustong pasalubungan ng lolo niya kasi paborito niya ito. Awwww.

SPRITE - Magpakatotoo ka-bulary
Dito ata sumikat sina Toni Gonzaga, Vhong Navarro at Ryan Agoncillo. Sino ba makakalimot dun sa mga linyang "I love you Piolo!!!" at "So, are you in heat?!" Ang galing nito... medyo corny na yung mga bandang huli, pero huli pa rin ang ugali ng kabataan noong mga panahong iyon. Kitikitext, salaminkero at kung anu-ano pa. Sobrang nakakaaliw. Noong panahon na ito, high school pa rin ako, matapos sumikat ang commercial na ito, dumami ang bading sa klase namin. "Nagpakatotoo daw sila!!!"

MCDONALD'S - Baby
Di siya Pinoy na commercial, pero patok na patok ito kasi sobrang nakakatawa talaga ang commercial na 'to. Yung baby na nagsuswing. Tapos parang baliw na umiiyak pag bumabalik sa likod ang swing at tumatawa pag nasa harap na. Kasi nakikita niya yung sign ng McDonald's. Riot tong commercial na 'to. As in naghahanap talaga ako ng channel na puros commercial lang baka matiyambahan yung palabas. Adik.

ROYAL - RJ
Madaming commercial si RJ noong 80's ata to. Pero ang naaalala at tumatak talaga sakin yung huli. Yung naglalaro sila ng truth or dare. Tapos yung dare kay RJ eh halikan yung unang babaeng pumasok sa pintuan. Tiyempong ang babaeng yun eh yung matagal nang crush ni RJ. Naaalala ko yung mga katulong namin dun dati sobrang kilig na kilig pag commercial na ng Royal. Nakakaaliw.

COKE - Nikki Gil
Hindi ko maalala yung title, pero parang unang lumabas ito pagkatapos ng bagong taon. Ang simple ng commercial na 'to actually, pero yung di ko makakalimutan yung kanta ni Nikki Gil. Ang ganda ng message ng kanta. Tapos magtataka ka kung bakit hindi nabibigatan si Nikki sa dala niya. Parang isang case ng Coke ang laman ng bag niya pero ambilis pa rin niyang maglakad. Crush ko pa nun si Nikki kasi parang di pa siya masyadong exposed sa publiko, unlike ngayon.

COLGATE - What's The Color of My Teeth
Hindi rin Pinoy yung original commercial nito, pero ginaya natin. Yung teacher na nagtatanung sa mga pre-school students niya ng tungkol sa colors. Tapos pagdating sa kulay ng ngipin niya, imbis na puti eh iba-iba ang binibigay na kulay. Nakakatawa siya kasi nakakaaliw ang innocence nung mga bata. Magbigay ba naman ng color na 'mother of pearl.' Panalo! Eto lang yung commercial na pati nanay ko ayaw ipalipat ang channel pag ito ang pinapalabas.

SELECTA - Sinong Best Friend Mo Doon?
Di ako sure kung Selecta Ice Cream nga ba talaga yung product o Presto or Tivoli, basta ice cream siya. Ang kwento eh, lilipat ng tirahan yung isang bata, tapos bago siya umalis, tinanong ito "Sinong best friend mo doon?" "Syempre ikaw lang!" Binaboy ni Tikboy at John Estrada tong commercial na'to pero okay lang. Ibig sabihin, talagang kumita ang konsepto ng commercial nila.

Ala lang. Reminiscing.

*********
McDonald's is handled by DDB advertising and not McCann as posted. Thank you Ms. Tessa!!!