BAGONG TAON, BAGONG MGA KAIBIGAN

Dahil hindi uso ang putukan tuwing bagong taon sa Estados Unidos, taon-taon na lang, maraming banyaga ang tumutungo sa Pilipinas para dito salubungin ang unang araw ng taon.

Last year, ang mga pinsan kong galing San Diego, ngayong taon naman eh ang kaibigan ng renter namin na galing Washington State. Mag-amang mangingisda na naghahanap ng Pilipinang mapapangasawa (yung tatay lang).

Buti na lang hindi kami mapapahiya sa mga bumibisita namin, dahil meron kaming terrace sa ikatlong palapag ng bahay namin kung saan, bawat lingon mo eh makakakita ka ng mga naggagandahang mga ilaw na nagkikislapan sa langit. Dito ako natutuwa sa Pilipinas. Kahit alam mong krisis na, hindi pa rin natin kayang alisin ang gumawa ng mga bagay para ipagdiwang ang mga okasyon sa buhay natin gaya ng bagong taon.

Sina Guy at Clayton ang aming mga bagong kaibigan sa pagbubukas ng taon, at natutuwa ako at nakilala ng pamilya namin sila dahil sila ay mukhang mababait na bisita. Walang arte sa buhay di katulad ng ibang mga banyaga na mapili sa mga kinakain at maraming arte sa buhay. Likas na palakaibigan ang dalawa, at kahit tumatagas na ang dugo sa mga ilong ng buong pamilya namin ay sige pa rin sila sa pagkausap sa amin.

Nanghihinayang lang ako, dahil dapat sa mga oras na ito eh kasama ako't nagtatampisaw sa tabing dagat sa Batangas (oo kahit madaling araw, kaya kong magbeach). May trabaho lang ako, kaya't hindi ako nakasama. Sabi ko pa naman ngayong taon eh hindi ko pakakawalan ang bawat pagkakataon na makalabas ng Maynila. Siguro may iba pang pagkakataon pa naman, 2 buwan naman sila mamamalagi dito sa bansa.

Sinimulan ko ang bagong taon na nakakilala ng mga bagong kaibigan, sana'y magtuluy-tuloy ito sa buong taon.